У Лепельскім раёне адбылася прэзентацыя калекцыі беларускіх народных строяў пад назвай «Беларусь мая сінявокая». Уборы створаны ў швейнай майстэрні аддзялення сацыяльнай рэабілітацыі і абілітацыі інвалідаў ДУ «ТЦСАН Лепельскага раёна» ў межах творчага праекта «Беларусачка», арганізаванага БелТІЗ.

Аўтар калекцыі — Вольга Мартыновіч, актыўны прадстаўнік Віцебскай абласной арганізацыі па Лепельскім раёне. Асаблівую атмасферу праекту надае ўдзел мужчын, якія далучыліся да стварэння аксесуараў. Гэта сведчыць пра шчырую агульную зацікаўленасць і адзінства.

Кожны касцюм прасякнуты гістарычнай памяццю: за кожным узорам стаіць талент, душэўнае цяпло і натхненне майстроў. У каляровай гаме і сакральных арнаментах выразна прачытваецца невычэрпная глыбіня беларускай культуры, вечныя каштоўнасці, якія беражліва перадаюцца з пакалення ў пакаленне.

Назва «Беларусь мая сінявокая» абрана невыпадкова — гэта шчырае прызнанне ў любові да роднай зямлі, да яе непаўторнай прыгажосці. Дзякуючы такім майстрам духоўныя скарбы нашага народа атрымліваюць новае жыццё, кранаючы сэрцы ўсіх, хто датыкаецца да іх.